پاکستان کو امید ہے دنیا افغانستان سے الگ رہنے کی غلطی نہیں دہرائے گی ، عمران خان

اسلام آباد : عمران خان نے کہا ہے کہ امید ہے دنیا افغانستان سے الگ رہنے کی غلطی نہیں دہرائے گی ، عالمی برادری افغانستان کے کمزور لوگوں کی مدد کرے کیونکہ افغانستان کو ضرورت کے وقت تنہا چھوڑنا کسی کے مفاد میں نہیں ہوگا،پاکستان انسانی بحران سے بچنے کے لیے افغانستان کو ہر ممکن مدد فراہم کرے گا ۔ وزیر اعظم عمران خان کی زیر صدارت ایپکس کمیٹی برائے افغانستان کا دوسرا اجلاس ہوا،اجلاس میں وفاقی وزراء وزیرخارجہ شاہ محمود قریشی، فواد احمد، شیخ رشید، اسد عمر، مشیران شوکت ترین اور عبدالرزاق داود، آرمی چیف جنرل قمر جاوید باجوہ، قومی سلامتی مشیر ڈاکٹر معید یوسف اور سینئر سول و عسکری حکام شریک تھے ۔

 وزیراعظم عمران خان نے کہا کہ ہنگامی صورتحال اور انسانی المیے سے بچنے کی خاطر پاکستان افغان عوام کے لیے ہر ممکن مدد فراہم کرے گا افغانستان کو ضرورت کے وقت تنہا چھوڑنا کسی کے مفاد میں نہیں ہوگا،حکومت پاکستان نے افغان عوام کی مدد کے لیے 5 ارب روپے کی امداد مختص کی ہے۔ وزیراعظم عمران خان نے ہدایت کرتے ہوئے کہاکہ پاکستان کے راستے افغان عوام کو امداد دینے والے بین الاقوامی اداروں کو سہولیات فراہم کی جائیں ۔ ایپکس کمیٹی کے شرکاء نے افغانستان میں ہنگامی صورتحال پر تشویش کا اظہار کیا۔ اجلاس میں 19دسمبر کو پاکستان کی سربراہی میں منعقد ہونیوالے او آئی سی اجلاس کے حوالے سے بھی گفتگو کی گئی تمام شرکا نے کہا قابل فخر بات ہے کہ پاکستان اتوار کو او آئی سی ممالک کے وزرائے خارجہ کے خصوصی اجلاس کی میزبانی کر رہا ہے، اس خصوصی اجلاس میں افغان عوام کی مشکلات کو اجاگر کیا جائے گا اور انکی مدد کے حوالے سے گفتگو ہوگی۔